មធ្យោបាយទាំង ១០ ដែលជួយអ្នកអោយមានជំនាញអន្តរបុគ្គលល្អ

តើអ្នកមានអ្នកចូលចិត្តច្រើននៅកន្លែងការងាររបស់អ្នកដែរឬទេ? ជំនាញអន្តរបុគ្គល គឺមានតម្លៃខ្លាំងណាស់នៅកន្លែងការងារនីមួយៗ។ ការគិតរបស់អ្នករួមការងារ មកលើរូបអ្នក គឺមានផលប៉ះពាល់ យ៉ាងធំ និងយូរអង្វែង ទៅលើការងាររបស់អ្នក ព្រមទាំងទៅលើការបំពេញការងារប្រចាំថ្ងៃរបស់អ្នក។ តោះទៅមើលមធ្យោបាយទាំង ១០ ដែលអាចជួយពង្រឹងលើជំនាញអន្តរបុគ្គលរបស់អ្នក។

អ្នកប្រហែលជាមនុស្សម្នាក់ដែលឆ្លាតជាងគេនៅកន្លែងធ្វើការរបស់អ្នក ប៉ុន្តែប្រសិនបើអ្នកមិនអាចចុះសម្រុងជាមួយនឹងអ្នករួមការងាររបស់អ្នកបានទេ នោះអ្នកនឹងមិនអាចរីកចម្រើនជាងនេះឡើយ។ ជាការល្អ នៅទីនេះមានវិធីសាស្ត្រមួយចំនួនដែលអ្នកអាចអនុវត្តដើម្បីពង្រឹងលើជំនាញនៅក្នុងសង្គម ហើយនឹងដើម្បីក្លាយខ្លួនជាមិត្តរួមក្រុមដ៏ល្អ។

១. ត្រូវមានទឹកមុខញញឹមជាប្រចាំ

មនុស្សដែលមានជីវិតស្រស់បំព្រង ជាទូទៅមានចំណុចសំខាន់មួយជានិច្ចគឺ៖ ពួកគេតែងតែសប្បាយរីករាយ។ ប្រសិនបើអ្នកតែងតែញញឹម និងមានគំនិតសុទិដ្ឋិនិយម អ្នករួមការងារនឹងចូលចិត្តអ្នកជាមិនខាន។ ហើយនៅពេលណាដែលអ្នកជួបរឿងមិនល្អ មិនត្រូវធ្វើអោយអ្នកដទៃមានអារម្មណ៍មិនល្អដូចជាអ្នកទេ។ អ្នកនឹងឃើញថា មនុស្សដែលជួបអ្នកតែងតែបង្ហាញនូវទឹកមុខរួសរាយដាក់អ្នកជានិច្ច។

២. បង្ហាញថា អ្នកយកចិត្តទុកដាក់ពីអ្នកដទៃ

នៅពេលដែលមានរឿងល្អកើតឡើង កុំស្ទាក់ស្ទើរនឹងលើកសរសើរអោយសោះ។ ប្រសិនបើមិត្តរួមការងាររបស់អ្នកបានធ្វើនូវអ្វីមួយដែលអ្នកពេញចិត្ត ទោះបីជារឿងតិចតួចក៏ដោយ កុំភ្លេចនិយាយពាក្យថា អរគុណ ទៅកាន់ពួកគេ។ អ្នកអាចស្វែងរកនូវចំណុចល្អណាមួយរបស់ក្រុមការងាររបស់អ្នក ហើយលើកសរសើរអោយពួកគេបានដឹង។ ផ្តល់ភាពកក់ក្តៅដល់មិត្តរួមការងារ នៅពេលដែលពួកគេទូរស័ព្ទមកលេង ឬមកសួរសុខទុក្ខអ្នកនៅក្នុងការិយាល័យរបស់អ្នក។

ការដែលបង្ហាញអ្នកដទៃ ថាអ្នកយកចិត្តទុកដាក់ពីពួកគេប៉ុណ្ណា វានឹងធ្វើអោយពួកគេតបស្នងមកអ្នកវិញដូចគ្នា ហើយថែមទាំងខំប្រឹងប្រែងធ្វើការងាររបស់គេអោយល្អប្រសើរថែមទៀតផង។

៣. ត្រូវគិតពីអារម្មណ៍របស់មិត្តរួមការងាររបស់អ្នក

សង្កេតមើលថាតើ មានអ្វីកើតឡើងចំពោះមិត្តរួមការងាររបស់អ្នកដែរឬទេ។ តាមដាននូវព្រឹត្តិការណ៍សប្បាយៗដែលកើតឡើងនៅក្នុងជីវិតរបស់ពួកគេ តាំងពីថ្ងៃខួបកំណើត ក៏ដូចជាថ្ងៃដែលកូនរបស់ពួកគេបានបញ្ចប់ការសិក្សា ហើយអ្នកត្រូវតែបង្ហាញពីអារម្មណ៍សោកស្តាយ នៅពេលដែលគេជួយប្រទះនូវបញ្ហាផ្ទាល់ខ្លួនដែលធ្ងន់ធ្ងរ។ បង្ហាញទៅមិត្តរួមការងារអ្នកថា អ្នកអោយតម្លៃទៅលើការរួមចំណែករបស់ពួកគេ ដោយផ្តល់ឱកាសអោយពួកគេបានបញ្ចេញមតិ។

៤. ធ្វើជាអ្នកស្តាប់ដ៏ល្អ

ការដែលធ្វើជាអ្នកស្តាប់ដ៏ល្អ បង្ហាញថា អ្នកមានបំណងទាំងស្តាប់ និងយល់ពីទស្សនៈរបស់អ្នកដទៃ។ ត្រូវប្រើប្រាស់ពាក្យសំដីរបស់អ្នក ទៅនិយាយឡើងវិញ នូវអ្វីដែលគេបានប្រាប់អ្នក។ ការធ្វើបែបនេះ អ្នកនឹងដឹងថាអ្នកកំពុងតែធ្វើអោយពាក្យសំដីរបស់គេ មានដំណើរការទៅមុខ ហើយការឆ្លើយតបរបស់អ្នក គឺត្រូវគេយកទៅគិតពិចារណាជាមិនខាន។ មិត្តរួមការងារនឹងមានអារម្មណ៍កាន់តែជិតស្និតជាមួយអ្នក ក៏ព្រោះតែអ្នកជាអ្នកស្តាប់ដ៏ល្អ ហើយអ្នកនឹងកាន់តែយល់ពីពួកគេថែមទៀតផង។

៥. លើកទឹកចិត្តអោយមានការធ្វើការងាររួមគ្នា

ជួយអោយមិត្តរួមការងារទទួលបាននូវភាពជោគជ័យ តាមរយៈការបង្កើតបរិយាកាសការងារដែលប្រកបទៅដោយភាពរីករាយ និងការសហការគ្នា។ ត្រូវផ្តល់តម្លៃទៅអ្នកគ្រប់គ្នា អោយបានស្មើៗគ្នា កុំគិតពីឋានានុក្រមរបស់គេ ហើយកុំចាត់ទុកថា គំនិតរបស់នរណាម្នាក់ ល្អជាងគំនិតរបស់អ្នកដទៃទៀតអោយសោះ។ កុំនិយាយដើម មិត្តរួមការងាររបស់អ្្នក។ ម្យ៉ាងទៀត ត្រូវតែពិចារណាលើយោបល់របស់មិត្តរួមការងាររបស់អ្នកជានិច្ច។ បន្ទាប់ពីធ្វើគារវកិច្ចជាមួយនឹងអ្នកគ្រប់គ្នាហើយ ត្រូវប្រាកដថា ពួកគេបានយល់ពីអ្នក។

ប្រសិនបើអ្នកធ្វើតាមគោលការណ៍មួយនេះ មិត្តរួមការងាររបស់អ្នកនឹងចាត់ទុកអ្នកថា ជាអ្នកដឹកនាំក្រុមដ៏ល្អ ហើយថែមទាំងជាមនុស្សដែលគួរអោយជឿទុកចិត្តថែមទៀតផង។

៦. ដោះស្រាយបញ្ហា

យោងលើចំនុចខាងលើ អ្នកបានដឹងរួចហើយពីវិធីដែលធ្វើអោយមានការសហការគ្នាល្អ ហើយពេលនេះជាពេលដែលអ្នកក្លាយទៅជាមនុស្សម្នាក់ដែលពួកគេអាចរត់មករកពេលមានបញ្ហាអ្វីមួយកើតឡើង។ នៅពេលដែលមិត្តរួមការងារមិនចុះសម្រុងគ្នា វានឹងធ្វើអោយបរិយាកាសនៅកន្លែងការងារទាំងមូលមានភាពល្អក់កករ ប៉ុន្តែអ្នកអាចធ្វើអោយស្ថានភាពមួយនេះប្រសើរឡើងតាមរយៈការដើរតួជាអ្នកសម្របសម្រួល។ គួរតែរៀបចំអោយមានការពិភាក្សាគ្នារវាងគូរភាគីដែលមានទំនាស់ ហើយព្យាយាមជួយពួកគេក្នុងការដោះស្រាយបញ្ហា។ វាមិនត្រឹមតែធ្វើអោយកន្លែងធ្វើការរបស់យើងពោរពេញដោយភាពសប្បាយរីករាយប៉ុណ្ណោះទេ ប៉ុន្តែអ្នកនឹងត្រូវបានគេចាត់ទុកថា ជាអ្នកដឹកនាំដ៏ល្អថែមទៀតផង។

៧. ត្រូវពូកែក្នុងការទំនាក់ទំនង

បន្ថែមពីលើការធ្វើជាអ្នកស្តាប់ដ៏ល្អ អ្នកត្រូវមានជំនាញក្នុងការទំនាក់ទំនងមួយទៀត។ នៅពេលកំពុងជួបពិភាក្សាជាមួយមិត្តរួមការងាររបស់អ្នក កុំទាន់និយាយរឿងអ្វីដែលអ្នកគិតឃើញភ្លាមៗអោយសោះ។ ផ្ទុយមកវិញ អ្នកគួរតែគិតអោយបានច្បាស់លាស់នូវពាក្យពេចន៍ដែលអ្នកត្រូវនិយាយ។ ការទំនាក់ទំនងដ៏ច្បាស់លាស់ អាចបញ្ចៀសនូវភាពយល់ច្រលំទាំងឡាយដែលអាចកើតឡើងរវាងអ្នក និងមិត្តរួមការងាររបស់អ្នក។

អ្នកដែលមានបំនិនក្នុងការនិយាយ គឺជាមនុស្សម្នាក់ដ៏ឆ្លាត និងចាស់ទុំបំផុត មិនថាអាយុរបស់ពួកគេប៉ុន្មាននោះទេ។ ប្រសិនបើអ្នកមានទំនោរក្នុងការបញ្ចេញមតិទៅកាត់យោបល់របស់អ្នកផ្សេងតាមអ្វីដែលអ្នកនឹកឃើញ អ្នកទាំងនោះនឹងមិនផ្តល់តម្លៃទៅលើគំនិតយោបល់របស់អ្នកនោះទេ។

៨. ធ្វើអោយពួកគេសើច

មនុស្សដែលកំប្លែងតែងតែមានគេចូលចិត្តច្រើន ដូច្នេះប្រសិនបើអ្នកមានជំនាញបែបនេះ សូមកុំភ្លេចយកវាមកប្រើអោយសោះ។ ដរាបណាដែលអ្នកបញ្ចៀសនូវរឿងកំប្លែងដែលមិនគប្បី និងការមិនសើចនៅពេលមានរឿងធ្ងន់ធ្ងរកើតឡើង មិត្តរួមការងាររបស់អ្នកនឹងចូលចិត្តអ្នកកាន់តែច្រើន។ ភាពកំប្លុកកំប្លែងអាចក្លាយជាអាវុធដ៏ល្អក្នុងការវាយបំបែកឧបសគ្គចំពោះមិត្តរួមការងារណាដែលមានភាពអៀនខ្មាស់ខ្លាំង និងចំពោះចៅហ្វាយណាដែលប្រើអារម្មណ៍ខ្លាំង។

៩. ត្រូវចេះគិតពីចិត្តរបស់អ្នកដទៃ

មនុស្សគិតពីអារម្មណ៍របស់អ្នកដទៃ អាចយល់ពីអារម្មណ៍របស់គេគ្រប់គ្នាច្បាស់ណាស់ ហើយការយោគយល់គឺជារឿងមួយដែលល្អបំផុតក្នុងការបំពេញការងារជាមួយពួកគេ។ ត្រូវតែពិចារណាអោយបានច្បាស់ពីស្ថានភាពជុំវិញទស្សនៈវិស័យរបស់មនុស្សម្នាក់ៗជាមុនសិន។ ជាក់ស្តែង ចម្លើយដែលត្រឹមត្រូវសម្រាប់អ្នកអាចមានរូបភាពផ្សេង ប្រសិនបើអ្នកពិចារណាពីទស្សនៈរបស់អ្នកដទៃ។

សរុបមក ត្រូវប្រុងប្រយ័ត្នក្នុងការប្រើប្រាស់ពាក្យសំដីរបស់អ្នក។ អ្នកដែលមានបញ្ហាក្នុងការគ្រប់គ្រងពាក្យសំដីរបស់ខ្លួនឯង គឺជាមនុស្សដែលពិបាកក្នុងការបញ្ចេញអារម្មណ៍របស់ខ្លួនប្រាប់អ្នកដទៃ។

១០. កុំពូកែរអ៊ូពេក

កន្លែងធ្វើការស្ទើរតែទាំងអស់តែងមានមនុស្សដែលពូកែរអ៊ូ ហើយអ្នកគួរតែចំណាំមើល ពួកគេតែងតែជាមនុស្សដែលមិនសូវមានគេចូលចិត្តទេ។ ប្រសិនបើអ្នកតែងតែរអ៊ូរពីរឿងនេះរឿងនោះ ភាពអវិជ្ជមានរបស់អ្នកនឹងរុញអ្នកអោយកាន់តែឆ្ងាយពីអ្នកដទៃជាមិនខាន។ ប្រសិនបើអ្នកចង់បន្ធូរអារម្មណ៍ អ្នកគួរតែសរសេរវានៅក្នុងកំណត់ហេតុរបស់អ្នក ឬក៏ផ្ញើសារទៅមិត្តជិតស្និត ឬគ្រួសាររបស់អ្នកអោយពួកគេស្តាប់។ បើមិនចឹងទេ អ្នកនឹងត្រូវគេចាត់ទុកថាជាមនុស្សអន់ចរិតជាមិនខាន។

សូមចុចទីនេះដើម្បីចូលមើលប្រភពដើមជាភាសាអង់គ្លេស