វិធីសាស្ត្រក្នុងការរៀនអោយបានយូរ

យើងគ្រប់គ្នាសុទ្ធតែធ្លាប់មានអារម្មណ៍ស្មុគស្មាញខ្លាំង នៅក្នុងកំឡុងពេលប្រលង ហើយនិងការព្យាយាមយកមេរៀនដែលរៀនមួយឆ្នាំ មកទន្ទេញ ឬមើលតែមួយសប្តាហ៍ ឬជួនកាលតែមួយថ្ងៃ។ យើងភ័យ នៅពេលដែលការប្រលងកៀកចូលមកដល់ ហើយចាប់ផ្តើមរៀនមេរៀនទាំងអស់តែក្នុងរយៈពេលមួយដ៏ខ្លីតាមដែលអាចធ្វើទៅបាន។ ជួនកាល យើងថែមបានរៀបចំពេលវេលារៀន ពី១២ ទៅ២០ម៉ោងដោយមិនសម្រាកទាល់តែសោះ។ ទោះបីជាមានមនុស្សជាច្រើនដែលបានអះអាងថា ការរៀនក្នុងរយៈពេលយូរមិនមានប្រសិទ្ធភាពអ្វីក៏ដោយ យើងនៅតែពឹងផ្អែកទៅលើពេលវេលាចុងក្រោយនេះដដែល។ ប្រសិនបើអ្នកស្បថថាអ្នកនឹងរៀនអោយចេះនៅនាទីចុងក្រោយនេះ ខាងក្រោមនេះគឺជាវិធីសាស្រ្តក្នុងការរៀនអោយបានយូរ៖

១. ត្រូវដឹងពីពេលវេលាដ៏ល្អបំផុតក្នុងការរៀន

សូមរៀនអោយបានយូរនៅកំឡុងពេលថ្ងៃ ហើយជៀសវាងការរៀននៅពេលយប់។ រូបរាងកាយ និងចិត្តរបស់អ្នក វាដើរស្របគ្នាជាមួយនឹងវដ្តរបស់ធម្មជាតិ ដែលបានបែងចែកពេលថ្ងៃ និងពេលយប់។ សូមជៀសវាងការរៀនពេលយប់តាមដែលអាចធ្វើទៅបាន បើទោះបីជាអ្នកមានសំពាធខ្លាំងយ៉ាងណាក៏ដោយ ជាពិសេសនៅពេលណាដែលអ្នកនឹងត្រូវមានការប្រលងនៅពេលព្រឹក។ អ្នកគួរតែរៀនដល់ត្រឹមម៉ោង ១០ ឬ១១បានហើយ ហើយសុខចិត្តក្រោកពីព្រលឹមដើម្បីរៀនបន្តទៀតវិញល្អជាង។ អ្នកត្រូវតែគេងយ៉ាងហោចណាស់អោយបាន៧ម៉ោងក្នុងមួយថ្ងៃ។ សូមសម្រាក ១០នាទី បន្ទាប់ពីអ្នកចំណាយពេលរៀន ១ម៉ោង ហើយសូមសម្រាកអោយបានយូរ នាពេលអាហារពេលល្ងាច ឬថ្ងៃត្រង់។ សូមចំណាយពេលសម្រាករបស់អ្នក នៅអោយឆ្ងាយពីបន្ទប់ដែលអ្នករៀន។

២. សូមប្រើប្រាស់វិធីសាស្ត្រនៃការរៀនខុសៗគ្នា

វិធីសាស្ត្រដ៏ងាយស្រួលបំផុតក្នុងការរៀនគឺអានអត្ថបទ ឬសៀវភៅពីមួយទៅមួយ ប៉ុន្តែវិធីសាស្ត្របែបនេះ មិនមានប្រសិទ្ធភាពនោះទេ។ អ្នកនឹងមានអារម្មណ៍ថាអស់កម្លាំងបន្ទាប់ពីរៀនបាន ៥ម៉ោង ហើយនឹងអាចភ្លេចនូវអ្វីដែលអ្នកបានអាន នៅពេលប្រលងទៀតផង។ សូមព្យាយាមប្រើប្រាស់វិធីសាស្ត្រណាដែលសកម្មក្នុងការរៀន ការចាំទ្រឹស្តី ទស្សនៈ និងគំនិតផ្សេងៗ។ ប្រើវិធីសាស្ត្រអាន និងសរសេររួមបញ្ចូលគ្នា ហើយទន្ទេញនូវទ្រឹស្តីនៅពេលដែលអ្នកក្រោកឈរ សង្ខេបនូវគំនិតរបស់អ្នក និងរៀនជាមួយនឹងមិត្តរួមថ្នាក់របស់អ្នក។ ការដែលប្រើប្រាស់វិធីសាស្ត្រច្រើនបញ្ចូលគ្នា វានឹងជួយក្នុងការពង្រឹងការយល់ដឹង និងការចងចាំរបស់អ្នក ។ បន្ថែមលើសនេះទៅទៀត អ្នកអាចរៀនបានយូរ ហើយថែមទាំងមិនមានអារម្មណ៍ថាអស់កម្លាំងទៀតផង។

៣. ត្រូវគិតពីការរំខានទុកជាមុន

គន្លឹះដ៏សំខាន់ដើម្បីរៀនអោយបានយូរ គឺអ្នកត្រូវចេះគិតពីការរំខានទុកជាមុន។ អ្នកគួរតែផ្តល់អាទិភាពទៅលើការសិក្សាមុននឹងផ្តល់ទៅលើរឿងផ្ទាល់ខ្លួនរបស់អ្នក។ ប៉ុន្តែ ជួនកាលអ្នកអាចនឹងព្យាយាមលួងលោមខ្លួនឯងអោយគិតពីរឿងផ្ទាល់ខ្លួនមុនការសិក្សាក៏អាចថាបានដែរ។ ជំនួសអោយការបាត់ទឹកចិត្តក្នុងការផ្តោតអារម្មណ៍ទៅលើការសិក្សា អ្នកគួរតែរៀនសង្កេតពីលំនាំនៃការរំខាននេះ ហើយព្យាយាមអត់ធ្មត់នឹងវាអោយមែនទែន។ អ្នកគួរតែផ្តល់អោយខ្លួនឯងនូវរង្វាន់មួយចំនួនដូចជា ការធ្វើនូវសកម្មភាពសប្បាយៗ បន្ទាប់ពីអ្នកបានរៀនអស់រយៈពេលជាច្រើនម៉ោង។ អ្នកនឹងមានកម្លាំងចិត្តក្នុងការបញ្ចប់ការរៀនរបស់អ្នកអោយទៅយ៉ាងរលូន ចឹងទៅអ្នកអាចលេងជាមួយនឹងមិត្តភក្តិ និងក្រុមគ្រួសាររបស់អ្នក បន្ទាប់ពីអ្នកបានបញ្ចប់កាតព្វកិច្ចរបស់អ្នក។

៤. ត្រូវមានសណ្តាប់ធ្នាប់គ្រប់ពេលវេលា

ការមានសណ្តាប់ធ្នាប់ជួយអោយយើងសន្សំសំចៃពេលវេលា។ សូមរៀបចំសម្ភារៈសិក្សាសម្រាប់មេរៀនរបស់អ្នកអោយមានសណ្តាប់ធ្នាប់ ដើម្បីងាយស្រួលក្នុងការរក ដោយអ្នកអាចរៀបចំតាមរយៈការបង្កើតជាFolder ឬBinderសម្រាប់មេរៀនសិក្សានីមួយៗដោយឡែកពីគ្នា។ ត្រូវប្រាកដថាអ្នកមានសម្ភារៈសិក្សាគ្រប់គ្រាន់សម្រាប់តម្រូវការរបស់អ្នក មុននឹងអ្នកចាប់ផ្តើមរៀន។ បើមិនចឹងទេ អ្នកនឹងខាតពេលវេលាក្នុងការរត់ទៅរត់មកដើម្បីរកសម្ភារៈទាំងនោះមិនខាន។ អ្នកក៏ត្រូវមានសណ្តាប់ធ្នាប់ក្នុងការរៀបសម្ភារៈក្នុងការសិក្សាតាមOnlineផងដែរ។

៥.ត្រូវដឹងថាកន្លែងណាដែលធ្វើយើងមានអារម្មណ៍ល្អក្នុងការរៀន

កន្លែងសម្រាប់ការសិក្សារបស់អ្នក អាចជាបន្ទប់គេងរបស់អ្នក ឬក៏ក្នុងបណ្ណាល័យ ព្រោះវាជាកន្លែងដែលស្ងាត់ និងមិនមានសម្លេងរំខាន។ កន្លែងរៀននោះត្រូវតែជាកន្លែងដែល គ្មានសត្វចិញ្ចឹម គ្មានទូរទស្សន៍ និងគ្មានវត្ថុណាមួយដែលរំខានអ្នក។ សូមប្រើកៅអីអង្គុយដែលមានផាសុខភាព និងបើកភ្លើងអោយបានសមល្មម ដើម្បីការពារកុំអោយមានបញ្ហាទៅលើ ក ខ្នង និងភ្នែករបស់អ្នក ពីព្រោះការឈឺចាប់ និងភាពមិនស្រណុកផ្នែកផ្លូវកាយនឹងទៅរំខានដល់ការសិក្សារបស់អ្នក។ សូមអង្គុយនៅលើកៅអីដែលមានតុសរសេរ ជាជាងការដេករៀននៅក្នុងបន្ទប់។

៦. ទុករបស់ញ៉ាំក្បែរខ្លួនអោយហើយ

ទុករបស់ញ៉ាំដែលអ្នកចូលចិត្តនៅក្បែរខ្លួន ដូចជា ស្ករសូកូឡា គ្រាប់ធុញ្ញជាតិ ផ្លែប៉ោមចំណិត ស្ត្រប៊័រី ឬប៊័រីខៀវជាដើម។ ត្រូវមានទឹកដាក់ក្បែរខ្លួន ដើម្បីកាត់បន្ថយការប្រើកម្លាំងទៅឆុងកាហ្វេ ឬតែយកមកញ៉ាំ។ ភេសជ្ជៈទាំងនោះធ្វើអោយអ្នកមិនមានអារម្មណ៍ថាងងុយគេង ប៉ុន្តែការញ៉ាំច្រើនជាបន្តបន្ទាប់ នឹងធ្វើអោយអ្នកមានអារម្មណ៍ថាអស់កម្លាំង ហើយពិបាកក្នុងការព្យាបាលណាស់។ អាហារល្អបំផុតដែលអ្នកគួរញ៉ាំមានដូចជា សូកូឡាខ្មៅ ស្ពីនណាញ ប្រូខូលី និងត្រី។

៧. សរសេរអំពីគោលដៅនៃការសិក្សារបស់អ្នក

ប្រសិនបើអ្នកចង់ចេះរបៀបនៃការរៀនអោយបានយូរ អ្នកគួររៀនបង្កើត និងសរសេរគោលដៅរបស់អ្នករៀងរាល់ថ្ងៃ។ តើអ្នកចង់បានអ្វីពីការសិក្សារបស់អ្នក? អ្នកគួរតែព្យាយាមដើម្បីអោយសម្រេចនូវបំណងរបស់អ្នកនៅក្នុងពេលសិក្សានោះ។ សូមបង្កើតគោលដៅដែលងាយក្នុងការធ្វើ ប៉ុន្តែត្រូវកំណត់ពេលវេលាអោយបានត្រឹមត្រូវ។

៨. សូមបិទឧបករណ៍អេឡិចត្រូនិកទាំងអស់

សូមបិទឧបករណ៍អេឡិចត្រូនិចទាំងអស់ ដើម្បីលុបបំបាត់នូវការរំខាន និងដើម្បីអោយអ្នកអាចផ្តោតអារម្មណ៍លើការសិក្សារបស់អ្នកកាន់តែប្រសើរ។ ត្រូវបិទកុំព្យូទ័ររបស់អ្នកផងដែរ លើកលែងតែករណីដែលអ្នកត្រូវប្រើវាសម្រាប់ការសិក្សារបស់អ្នក។ គេហទំព័រ និងSoftware ដូចជា Think, SelfControl អាចជួយអ្នកប្លុកគេហទំព័រទាំងឡាយណាដែលអ្នកមិនត្រូវការប្រើ ដែលធ្វើអោយអ្នកពិបាកផ្តោតអារម្មណ៍លើការសិក្សា ដូចជា Facebook ជាដើម។ អ្នកអាចចូលលេងវា បន្ទាប់ពីអ្នកបញ្ចប់ការសិក្សារបស់អ្នកបាន។

៩. យកពេលវេលាគិតពីរឿងផ្សេងខ្លះ

រឿងល្អ និងអាក្រក់នៅក្នុងជីវិតជាក់ស្តែង អាចមាននៅក្នុងការគិតរបស់អ្នក នៅក្នុងពេលដែលអ្នកសិក្សា ហើយវាថែមទាំងអាចរំខានអ្នកទៀតផង។ ត្រូវចាំថា អ្នកត្រូវតែគ្រប់គ្រងការគិតរបស់អ្នកអោយបានល្អ។ ដូច្នេះ សូមបង្កើតផែនការសម្រាប់គិតពីរឿងទាំងនេះ បន្ទាប់ពីអ្នកសិក្សា ហើយត្រូវទំលាក់ចោលនូវការរំខានទាំងនោះចេញអោយអស់។ ដាក់ខ្មៅដៃ និងក្រដាសនៅក្បែរខ្លួនរបស់អ្នក ដើម្បីទុកកត់ត្រាចូលនូវអ្វីដែលជ្រៀតចូលមកក្នុងខួរក្បាលរបស់អ្នក នៅពេលដែលអ្នកកំពុងសិក្សា ហើយបន្ទាប់មកយករឿងទាំងនោះមកគិត នៅពេលដែលអ្នកសម្រាក។

១០. ប្រើប្រាស់វិធីក្នុងការសិក្សាណាដែលមានសកម្មភាពរស់រវើក

ការអានមិនឈប់ឈរ អាចធ្វើអោយអ្នកមានអារម្មណ៍ថាធុញទ្រាន់ ជាពិសេសនៅពេលដែលអ្នកមិនចូលចិត្តមុខវិជ្ជាមួយហ្នឹង។ វិធីសាស្ត្រនៃការអានដ៏សកម្ម អាចជួយពង្រឹងលើការផ្ចង់អារម្មណ៍របស់អ្នក និងធ្វើអោយការសិក្សារបស់អ្នកកាន់តែមានប្រសិទ្ធភាពទៀតផង។ ជាឧទាហរណ៍ អ្នកអាចផ្អាកការអាន ហើយសួរនូវសំណួរ និងសង្ខេបអោយលឺៗ នូវអ្វីដែលអ្នកបានអាន ដោយមិនចាំបាច់មើលសៀវភៅរបស់អ្នក។

១១. ចាប់ផ្តើមរៀនមេរៀនណាដែលពិបាកមុនគេ

គួរតែចាប់ផ្តើមរៀននូវមេរៀនណាដែលចាំបាច់ នៅពេលដែលការផ្ចង់អារម្មណ៍របស់អ្នកល្អ ហើយបន្ទាប់មកចាំទៅរៀនមេរៀនណាដែលមិនចាំបាច់។ អ្នកនឹងបារម្ភកាន់តែខ្លាំងជាមួយនឹងមេរៀនមួយណាដែលលំបាក ប្រសិនបើអ្នកចាប់ផ្តើមរៀនមេរៀនដែលងាយមុនគេ ដែលធ្វើអោយការសិក្សារបស់អ្នកកាន់តែមិនមានប្រសិទ្ធភាព។ សូមកុំមានអារម្មណ៍ថាស្មុគស្មាញប្រសិនបើអ្នកមិនអាចដោះស្រាយនូវសំណួរ ឬបញ្ហាណាដែលលំបាក ហើយកំណត់ពេលវេលាដែលត្រូវដោះស្រាយវាដើម្បីទុកពេលខ្លះដោះស្រាយសំណួរដទៃទៀត។

១២. មធ្យោបាយផ្សេងទៀតដែលជួយអ្នកអោយរៀនបានរយៈពេលយូរ

គន្លឹះបន្ថែមដើម្បីរៀនអោយបានយូរមានដូចជា៖

គួរតែគេងអោយបានយ៉ាងហោចណាស់ពីចន្លោះពី ៧ ទៅ៩ម៉ោងរៀងរាល់យប់។ ការគេងអាចជួយអ្នកអោយមានកម្លាំង ជួយរក្សាព័ត៌មាន និងផ្តល់លំនឹងដល់អរម៉ូនទៀតផង។
ត្រូវមានរបបអាហារដែលមានផាសុខភាពដើម្បីរក្សាកម្លាំងរបស់អ្នក និងថែមទាំងអាចធ្វើអោយអ្នកមានអារម្មណ៍របស់ផ្តោតទៅលើការសិក្សាកាន់តែល្អប្រសើរថែមទៀត។ អ្នកគួរតែញ៉ាំដូចជា ប្រភេទអាហារដែលមានសារជាតិស្រូវ គ្រាប់ធុញ្ញជាតិ ផ្លែឈើ បន្លែ សាច់ និងអាហារដែលសំបូរជាតិខ្លាញ់ល្អ។ អាហារសំបូរជាតិខ្លាញ់ល្អមានដូចជា ប្រេងអូលីវ និងប្រេងដែលមាននៅក្នុងស្ករសូកូឡាខ្មៅ។ ជៀសវាងអាហារអាហារមួយចំនួនដូចជា ស្ករស ប៉េងប៉ោះ ខ្លាញ់ នំប័ុងស និងម្សៅ។

សូមចុចទីនេះដើម្បីមើលប្រភពដើមជាភាសាអង់គ្លេស